Туркойз Хилл: Оюутолгойн алт олборлолт оны эхний улиралд 457%-иар өсөв

2021-04-21 15:16


Оюутолгойн 66%-ийг эзэмшдэг “Туркойз Хилл Ресурс” компани 2021 оны нэгдүгээр улирлын үйлдвэрлэлийн тайлангаа танилцууллаа. Оны эхний улиралд Оюутолгойн баяжуулах үйлдвэрт 9.81 сая тонн хүдэр боловсруулж, 201.9 мянган тонн баяжмал үйлдвэрлэжээ. Ингэснээр зэсийн баяжмалын үйлдвэрлэл өмнөх оны мөн үеийнхээс 22.7%-иар өссөн байна. Энэ дундаа баяжмал дахь цэвэр металын агуулгаар авч үзвэл зэс олборлолт 45.4 мянган тонн, алтных 145.7 орчим мянган унц байжээ. Энэ нь зэсийн олборлолт өнгөрсөн оны мөн үеийнхээс 29%, өмнөх дөрөвдүгээр улирлынхаас 9%-иар тус тус өссөн гэсэн үг. Харин алтны олборлолт өмнөх оны мөн үеийнхээс даруй 457%, өнгөрсөн дөрөвдүгээр улирлынхаас 66%-иар өссөн дүнтэй гарлаа.

Ийнхүү зэс, алтны олборлолт өссөн нь оны эхний улиралд 4b болон 6b үе шатны илүү баялаг агуулгатай хүдрийн хэсэг рүү олзворлолт хийсэнтэй холбоотой ажээ. Энэ оны туршид хүдрийн баялаг агуулгатай хэсэгт олборлолт үргэлжлэх төлөвтэй байна.

Харин борлуулалтын тухайд оны эхний улиралд 186.3 мянган тонн баяжмал худалдаалжээ. Энэ нь өмнөх оны мөн үеийнхээс 48%-иар өссөн үзүүлэлт юм.

Тус компани гуравдугаар сарын 30-нд Хятадын худалдан авагч нарт гэрээний хугацаанд бүтээгдэхүүн нийлүүлэх боломжгүй буюу давагдашгүй нөхцөл байдал үүссэнийг мэдэгдсэн. Учир нь Оюутолгой уурхайд цар тахлын хоёр ч тохиолдолд гуравдугаар сарын дундуур бүртгэгдсэнээр компанийн баяжмал тээвэрлэлт зогссон юм. Өөрөөр хэлбэл Хятадын тал цар тахлын халдвараас урьдчилан сэргийлэх үүднээс тус компанийн баяжмал ачсан тээврийн хэрэгслийг хилээрээ нэвтрүүлэхийг түр хугацаанд зогсоосон. Харин дөрөвдүгээр сарын 15-наас баяжмал тээвэрлэлт тодорхой хэмжээгээр сэргэж, өдөрт 32 машин хилээр нэвтэрч эхэлсэн. Тус компани мөн Улаанбаатараар дамжуулан баяжмал тээвэрлэх хувилбарыг судалж байгаа ажээ.

Уурхайн талбайд халдвар гарсантай холбогдуулан далд уурхайн бүтээн байгуулалт хэсэг хугацаанд зогсоод байсан нь одоо эргээд ажил урагшлах болсон талаар компанийн тайланд дурджээ.

“Туркойз Хилл Ресурс” болон “Рио Тинто”-ийн төлөөлөл Монгол Улсын Засгийн газартай төслийн хэлэлцээрийг хийхээр гуравдугаар сард Улаанбаатарт ирсэн. Компанийн зүгээс төслийг бүхий л хувьцаа эзэмшигчдэд ашигтай байх, тэр дундаа монголчуудад үр өгөөжтэй байхуйц шийдлийг олох чиглэлд хэлэлцээр хийхээр ажиллана гэдгээ албан мэдээндээ өгүүлжээ.

Мөн Монголын тал далд уурхайн агуйлах ажлыг (undercut) эхлүүлэхэд шаардлагатай зөвшөөрлийг олгох ажил хүлээгдэж байгааг онцолжээ.

“Оюутолгой” компани хоёрдугаар сард 2016-2018 оны үйл ажиллагаанд хамаарах 230 сая ам.долларын татварын акт, гуравдугаар сард 2013-2015 оны үйл ажиллагаанд хамаарах 126 сая ам.долларын татварын актын төлбөрийг барагдуулсан байна. Хэдийгээр татвартай холбоотой маргаан арбитр дээр шийдэгдээгүй байгаа ч Монгол Улсын холбогдох хууль тогтоомжийн дагуу дээрх төлбөрийг барагдуулах үүрэгтэй байдаг. Туркойз Хилл-ийн хувьд “Оюутолгой” компани бүхий л шаардлагатай татвар, хураамжаа төлж барагдуулсан гэсэн байр суурьтай хэвээр болохыг тэмдэглэжээ. Хэрэв арбитр дээр тус компанийн талд шийдвэр гарвал дээрх төлбөрийг Монгол Улс буцааж барагдуулах юм.

Б.Төгс  

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • Уржигдар 16 цаг 26 минутад
    Дэлхийн зэсийн импортын зах зээлийн тал хувийг дангаараа бүрдүүлдэг Хятад улс стратегийн нөөцөөсөө зарим түүхий эдийг дотоодын үйлдвэрлэгчдэд нийлүүлэхээр болсон тухай зарлаж (2021.06.16) байна. Энэ нь зах зээл дэх нийлүүлэлтийг нэмэгдүүлж, ханшийг бууруулах зорилготой. Үүнд зэс, цайр, хөнгөн цагаан багтана. 2010 оноос хойш Хятадын Засгийн газрын хийж буй анхны алхам гэж шинжээчид үзэж байна. Ингэснээр зэсийн ханш сүүлийн хоёр сарын хугацаан дахь хамгийн доод түвшинд хүрч, нэг тонн нь 9427 ам.долларт хүрлээ. Тодруулбал зургадугаар сар гарсаар зэсийн ханш Лондоны металын бирж дээр 7.7%-иар буурчээ.
  • Уржигдар 11 цаг 49 минутад
    “Эрдэс баялгийн бирж ”  гэсэн нэршлийг “Уул уурхайн бүтээгдэхүүний  бирж”   нэрлэх  нь илүү оновчтой. Олон улсад Лондоны металын бирж, Лондоны алт,мөнгөний бирж, Шанхайн металын бирж, Беларусын барааны бирж, Тянжины уул уурхайн бүтээгдэхүүний  бирж зэрэг олон улсын, бүс нутгийн  болон орон нутгийн чанартай. Дэлхий дахинд 200 гаруй бирж үйл ажиллагаа явуулж байна. Эдгээр бирж нь биет бүтээгдэхүүн болон ирээдүйд үйлдвэрлэх бүтээгдэхүүнийг тогтоосон хугацаанд тодорхой байршлаар нийлүүлэн арилжаалдаг. Монгол Улсад уул уурхайн бүтээгдэхүүний  бирж байгуулах боломж, хууль эрх зүйн орчны судалгааг 2013 онд Монголын Экспортлогчдын холбоо хийсэн.
  • 2021-06-17 12:27
    Эрдэс баялгийн салбарын үр ашиг, өгөөж, бүтээмжийг нэмэгдүүлэх, төрийн байгууллагын үйлчилгээг нээлттэй, хүнд сурталгүй, ил тод хариуцлагатай болгоход чиглэсэн “Эрдэс баялаг-цахим шилжилт” хэлэлцүүлгийг УУХҮЯ-наас  өнгөрсөн сард зохион байгуулахаар товлосон боловч хойшлогдсон билээ. Тэгвэл Байгалийн баялгаас оюуны баялагт уриан дор тус цахим  хэлэлцүүлгийг маргааш зохион байгуулахаар болжээ.
  • 2021-06-17 11:40
    ОХУ-ын Холбооны гаалийн газрын мэдээллээр, дөрөвдүгээр сард тус улс 1.66 сая тонн коксжих нүүрс экспортолжээ. Энэ нь өнгөрсөн оны мөн үеэс 7.61%-иар, өмнөх гуравдугаар сараас 48.82% -иар тус тус буурсан үзүүлэлт аж. Оны эхний дөрвөн сарын байдлаар нийт 8.53 сая тонн коксжих нүүрс экспортолсон байна. Мөн хугацаанд тус улсын  нүүрсний нийт экспортын хэмжээ 85.25 тоннд хүрсэн юм. Тэгвэл тавдугаар сард 19.27 сая тонн нүүрс экспортолсон нь түүхэн дээд хэмжээгээр тооцогдож байна.
  • 2021-06-16 14:20
    Хятадын “China Aluminum Corporation” (Chinalco) компани нь нүүрстөрөгчийн давхар ислийн ялгаруулалтаа 2025 оноос өмнө бууруулж эхлэн, 2035 он гэхэд 40%-иар багасгах зорилтоо мэдэгджээ. Тус компани өнгөрсөн онд 3.69 сая тонн хөнгөн цагааны анхдагч үйлдвэрлэлийн 50%-д усан цахилгаан станцын эрчим хүч ашигласан тул “ногоон” үйлдвэрлэлд хамаарна гэж “Chinalco” үзэж байна. Тиймээс цаашид үйлдвэрлэлдээ нар, салхи  зэрэг сэргээгдэх эрчим хүчний ашиглалтыг нэмэгдүүлэхээр төлөвлөж буй аж. Энэ зургадугаар сард “Chinalco” нь анх удаа 400 сая юанийн (63 сая ам.доллар) дүнтэй бонд гаргажээ. Энэхүү хөрөнгийг “ногоон” зорилт буюу салхин паркийн бүтээн байгуулалтын өрийг дахин санхүүжүүлэхэд зарцуулах юм байна.