ОХУ газрын тосны бүтээгдэхүүнээ тогтвортой нийлүүлж хамтын ажиллагааг гүнзгийрүүлнэ

Аж үйлдвэр, эрдэс баялгийн сайд Ц.Туваан газрын тосны бүтээгдэхүүн нийлүүлэх салбарт хамтран ажиллах тухай Монгол Улсын Засгийн газар, ОХУ-ын Засгийн газар хоорондын хэлэлцээрт ОХУ-ын Эрчим хүчний сайд С.Е.Цивилевтэй гарын үсэг зурлаа.

Монгол Улс газрын тосны бүтээгдэхүүний хэрэглээгээ 100 хувь импортоор хангаж байгаа бөгөөд нийт импортын 95 орчим хувийг ОХУ эзэлж байна.

Оросын Холбооны Улсын газрын тосны бүтээгдэхүүний дотоодын нөхцөл байдалтай холбоотойгоор тус улсын Засгийн газраас 2023 онд шатахууны экспортод хязгаарлалт тавьж, ОХУ-ын Засгийн газартай газрын тосны бүтээгдэхүүний худалдааны хамтын ажиллагааны хэлэлцээртэй улс орнууд болон Евразийн эдийн засгийн  холбооны гишүүн орнууд хамаарахгүй байхаар зохицуулсан.

Тухайн нөхцөл байдалтай холбоотойгоор Засгийн газраас холбогдох арга хэмжээг авч, талууд тус хэлэлцээрийг байгуулснаар Монгол Улс, ОХУ-ын газрын тосны салбарын хамтын ажиллагааг гүнзгийрүүлж, ОХУ-аас Монгол Улсад газрын тосны бүтээгдэхүүн тогтвортой ханган нийлүүлэх боломжийг бүрдүүлж байгаа юм.