"Тавантолгой төмөр зам" тээврийн үйл ажиллагаанаас улсын төсөвт 10.8 тэрбум төгрөгийн татвар төлжээ

"Тавантолгой төмөр зам" ХХК 2024 онд 4 сая гаруй тонн ачаа тээвэрлэжээ. Энэ нь 2023 оныхоос 2 дахин их тээвэрлэлт юм. Мөн тээврийн үйл ажиллагаанаас 42.4 тэрбум төгрөгийн цэвэр ашигтай ажиллаж улсын төсөвт 10.8 тэрбум төгрөгийн татвар төлжээ.

Тус компанийн хувьд төмөр замын суурь бүтэц барих төслөөс тээвэрлэлтийн үйл ажиллагаа руу шилжсэн цагаас төмөр замын хөдлөх бүрэлдэхүүний хүчин чадлыг нэмэгдүүлж, парк шинэчлэлийг сайжруулах шаардлага үүсээд байсан юм. Тиймээс тээврийн паркаа орчин үеийн, өндөр хүчин чадалтай, аюулгүй ажиллагааг хангасан 16 зүтгүүр, 800 вагоноор шинэчилж тээвэрлэлтэд нэвтрүүлжээ.

Зүтгүүрүүдийн хувьд АНУ-ын "Progress Rail A Caterpillar" компанид үйлдвэрлэсэн SD70ACE/LW загварын Монгол орны говийн байгаль, цаг агаарын нөхцөлд тохирсон, 4500 морины хүчтэй, дизель хөдөлгүүртэй, орчин үеийн технологиор тоноглогдсон гэдгээрээ онцлогтой аж. Харин ачааны вагоны хувьд ОХУ-ын Тихвинскийн үйлдвэрээс нийлүүлсэн 25 тонн голын даацтай, олон улсын стандартын шаардлагыг хангаж буй техник юм.

Ийнхүү парк шинэчлэл хийсний үр дүнд тус компани 2024 онд тээврийн үйл ажиллагаанаас 95.1 тэрбум төгрөгийн орлогыг төвлөрүүлж, 42.4 тэрбум төгрөгийн цэвэр ашигтай ажилласнаас улсад нийт 10.8 тэрбум төгрөгийн татварыг төлсөн байна.

Энэ онд хэрэгжиж эхлэх Гашуунсухайт-Ганцмод боомтын хил дамнасан төмөр замын бүтээн байгуулалтын барилгын ажил дуусаж, хоёр улсын хооронд төмөр замаар хил нэвтрэх гүүрэн гарц баригдсанаар тус компани суурь бүтцээрээ жилдээ 30 гаруй сая тонн ачааг тээвэрлэх зорилт дэвшүүлжээ.

Эх сурвалж: Тавантолгой төмөр зам