Улсын хэмжээнд бүх төрлийн тээвэр 1.6%-аар өсжээ

Улсын хэмжээнд бүх төрлийн тээврээр 2025 оны 1 дүгээр сард 10.3 сая тонн ачаа тээвэрлэжээ. Энэ нь өмнөх оны мөн үеэс 1.6%-аар өссөн байна. Нийт ачаа тээврийн 63.27%-ийг автотээврээр, 36.72%-ийг төмөр замаар, 0.01%-ийг агаарын тээврээр тээвэрлэжээ.

Түүнчлэн автотээврээр 2025 оны 1 сард нийт 6.5 сая тонн ачаа тээвэрлэсэн нь өмнөх оны мөн үеэс 0.4%-аар буурсан үзүүлэлттэй юм. Үүнээс экспортын ачаа 6.3 сая тонн болж өмнөх оны мөн үеэс 0.8%-аар буурсан бол импортын ачаа 191.8 мянган тонн болж өмнөх оны мөн үеэс 16.2%-аар өссөн байна.

Харин төмөр замын тээврээр 2025 оны 1 сард нийт 3.8 сая тонн ачаа тээвэрлэсэн нь өмнөх оны мөн үеэс 5.1%-аар өссөн үзүүлэлт юм. Үүнээс экспортын ачаа 1 сая тонн болж өмнөх оны 1 дүгээр сараас 14.3%-аар, дотоодын ачаа 2 сая тонн болж өмнөх оны 1 дүгээр сараас 5.2%-аар тус тус өссөн бол импортын ачаа 345.6 мянган тонн болж өмнөх оны мөн үеэс 3.3%-аар, дамжин өнгөрсөн ачаа 399.0 мянган тонн болж өмнөх оны мөн үеэс 7.9%-аар тус тус буурсан үзүүлэлттэй байна.

Агаарын тээврээр 2025 оны 1 сард нийт 627.3 тонн ачаа, шуудан тээвэрлэсэн нь өмнөх оны мөн үеэс 17.7%-аар буурсан үзүүлэлт юм. Үүнээс ачаа тээвэр 609.6 тонн болж өмнөх оны 1 дүгээр сараас 17.9%-аар, шуудан тээвэр 17.7 тонн болж өмнөх оны мөн үеэс 9.2%-аар тус тус буурсан үзүүлэлттэй байна.

Эх сурвалж: Зам, тээврийн яам