“Монгол-Солонгосын хамтарсан ховор металлын судалгааны төв”-ийг 6 дугаар сард нээнэ

БНСУ-ын Засгийн газрын хөгжлийн албан ёсны тусламж (ODA)-ийн санхүүжилтээр, БНСУ-ын Худалдаа, аж үйлдвэр, эрчим хүчний яам (MOTIE) болон Монгол Улсын Аж үйлдвэр, эрдэс баялгийн яам хамтран 2023 оноос хэрэгжүүлж байгаа ховор металлд нэмүү өртөг шингээх, эргэлтэд оруулахад дэмжлэг үзүүлэхэд чиглэсэн “Монгол-Солонгосын хамтарсан ховор металлын судалгааны төв” байгуулах хамтын ажиллагааны 2 дугаар хурал 2025 оны 3 дугаар сарын 12-16-нд Сөүл хотноо зохион байгууллагдлаа.

Хамтарсан хорооны хурлаар “Монгол-Солонгосын хамтарсан ховор металлын судалгааны төв” байгуулах төслийн ажлын явц, “Геологийн судалгаа-шинжилгээний төв” ТӨҮГ, Солонгосын КИГАМ байгууллагын хамтран хэрэгжүүлж байгаа геологийн судалгааны ажлын өнөөгийн нөхцөл, ололт амжилт болон бусад асуудлын талаар харилцан мэдээлэл солилцов. Мөн цаашид ховор металлын судалгааны төвийн тоног төхөөрөмжийг 5 дугаар сард багтаан суурилуулж үйл ажиллагааг 2025 оны 6 дугаар сард нээх, төвийн үйл ажиллагаагаар дамжуулан эрдэс баялгийн салбар дахь хоёр орны хамтын ажиллагаанд дэмжлэг үзүүлэх асуудлаар санал солилцжээ. 

Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар энэ үеэр “Монгол-Солонгосын хамтарсан ховор металлын судалгааны төв” байгуулах төсөл нь Монгол Улсын Засгийн газрын зүгээс баримталж буй уул уурхайн олборлолтоос нэмүү өртөг шингээсэн бүтээгдэхүүн үйлдвэрлэж, дэлхийн зах зээлд нийлүүлэх бодлогод нийцэж байгааг тэмдэглэж, үр дүнтэй хэрэгжилтийг хангахыг цохон тэмдэглэв.

Эх сурвалж: Аж үйлдвэр, эрдэс баялгийн яам