Г.Гүнбилэг: Дотоодод төдийгүй хилийн чанадад байгаа мэргэжилтнүүдийн оролцоог дэмжиж, арга хэмжээний цар хүрээг нэмэгдүүлж байгаа

“Монголын геологи, хайгуул-2025” чуулга уулзалт (Mongolian mineral exploration-2025) энэ сарын 27,28-нд болох гэж байна. Тус чуулга уулзалтын үеэр зохион байгуулагдаж буй Хөрөнгө оруулалтын бизнес уулзалтын талаарх мэдээллийг хамтран зохион байгуулагч “Тригтек” ХХК-ийн ахлах геологич, хөрөнгө оруулалтын шинжээч Г.Гүнбилэгээс тодрууллаа.

-“Монголын геологи, хайгуул-2025” чуулга уулзалт энэ сард зохион байгуулагдах гэж байна. Тэгэхээр юу түрүүнд тус үйл ажиллагааны талаар дэлгэрэнгүй мэдээлэл өгөхгүй юу?

-Монголын Үйлдвэрлэлийн Геологичдын холбооноос /МҮГХ/ 2009 оноос эхлэн тогтмол зохион байгуулж ирсэн энэхүү чуулга уулзалт нь эрэл хайгуулын геологич болон салбарын мэргэжилтнүүдийн наадам эсвэл цагаан сарын баяр шиг хүлээн авдаг том уулзалт болдог. Энэ ч утгаараа нэлээн хүлээлттэй, оролцогч талууд болох салбарын яам, тамгын газар, гүйцэтгэгч агентлаг болон хувийн хэвшил, эрдэмтэн судлаачид, энэ чиглэлийн оюутан залуус оролцдог өргөн цар хүрээтэй арга хэмжээ юм.

- XVI дахь удаагаа зохион байгуулагдах энэ үйл ажиллагаа өмнөх жилүүдийнхээс юугаараа онцлог байх вэ?

-Энэ удаагийн чуулга уулзалт нь “Геологи хайгуулын ажлыг дэмжих нь” уриа дор явагдаж байгаа нь цаг үеийн эрэлт хэрэгцээг мэдэрсэн, онцлог агуулгатай болох хүлээлттэй байна. Танхим болон онлайн хосолсон байдлаар зохион байгуулагдаж байгаа нь дотоодод төдийгүй хилийн чанадад байгаа мэргэжилтнүүдийн оролцоог дэмжиж, арга хэмжээний цар хүрээг нэмэгдүүлж байгаа.

Түүнчлэн жил болгон салбарын мэргэжилтнүүдийг чадавхжуулах үүднээс төрөл бүрийн сургалтууд явагддаг. Энэ удаад Beach Meadows Resources Inc-ын Эдийн засгийн зөвлөх Майкел.Д (Micheal Dogget), Mineral-X-ийн үүсгэн байгуулагч, Станфордын Их сургуулийн профессор  Жеф.К (Jef Caers) нар урилгаар хүрэлцэн ирж илтгэл, сургалт орж байгаа нь бас нэгэн онцлох зүйл.

-Танай байгууллага тус үйл ажиллагаанд ямар үүрэгтэй оролцож байна вэ?

-Тригтек ХХК нь 2023 оны 12 дугаар сараас эхлэн Монгол улсаас БНХАУ-д суугаа элчин сайдын яамны дэмжлэгтэйгээр Аж үйлдвэр эрдэс баялгийн яам, хэрэгжүүлэгч агентлаг болох Ашигт малтмал газрын тосны газар, түүнчлэн хоёр орны Уул уурхайн ассоциаци, Хятадын Азийн эдийн засгийн хөгжлийн нийгэмлэг, Уул уурхайн мэргэжлийн хороо зэрэг холбогдох бүхий л шатны оролцогч талуудтай хамтран нийт 4 удаагийн “Торгоны замын хөрөнгө оруулалт: Уул уурхайн төслийн танилцуулга” арга хэмжээг амжилттай зохион байгуулж ирсэн.

Бид арга хэмжээний цар хүрээг улам өргөжүүлэн, хөрөнгө оруулалт хүлээж буй томоохон төслүүдийг хамруулан, “Монголын геологи, хайгуул чуулга уулзалт-2025”-ын үеэр хөрөнгө оруулагчдын бизнес уулзалт зохион байгуулахаар төлөвлөж байна.

-Байгууллагынхаа талаар товч танилцуулбал?

-Тригтек ХХК нь уул уурхай, олборлох салбарын өөрчлөлт шинэчлэлтэд гар бие оролцон хөгжүүлэх, олон улсад тэргүүлэгч, дэвшилтэт технологийг нэвтрүүлэх зорилготой геологи, уул уурхайн инженерчлэлийн зөвлөх үйлчилгээний мэргэшсэн компани. Бид  программ хангамж нэвтрүүлэхээс гадна олон улсын стандартад нийцсэн QA/QC шаардлага хангах геологи хайгуулын ажлыг гүйцэтгэдэг

Түүнчлэн Монгол Улсын уул уурхайн салбарт хариуцлагатай хөрөнгө оруулалтыг нэмэгдүүлэх үндсэн зорилгын хүрээнд ашигт малтмал, уул уурхайн төсөл болон хөрөнгө оруулагчдын харилцааг ойртуулах, шаардлагатай техникийн үйлчилгээг гүйцэтгэх, хууль эрх зүй болон олон улсын стандартад нийцсэн хөрөнгө оруулалтын мэргэжлийн зөвлөх үйлчилгээг үзүүлж байна.