Энэтхэгийн Засгийн газар эрчим хүчний салбараа дэмжиж байна

Р.Ренчиндулам

Энэтхэгийн Засгийн газар дулааны цахилгаан станцуудынхаа нүүрс нийлүүлэлтийн журамд томоохон өөрчлөлт оруулж, Нүүрс түгээх бодлого (NCDP) -оос “Шакти” бодлогод шилжиж байгаагаа зарлалаа. “Observervoice.com”-д бичсэнээр нүүрсний олборлолт түүхэн дээд хэмжээнд хүрсэн энэ үед Энэтхэгийн Засгийн газар эрчим хүчний салбараа дэмжихийн тулд ийнхүү дотоодын нүүрсний хүртээмжийг нэмэгдүүлэхэд анхаарч байна хэмээн шинжээчид онцолжээ.

Бодлогын хүрээнд нүүрсний компаниуд болон цахилгаан станцуудын хооронд байгуулсан Түлш нийлүүлэх гэрээнд арилжааны нөхцөлийг үндэслэн нүүрс нийлүүлэхээр болсон. Энэхүү уян хатан байдал нь цахилгаан станцуудыг үр ашигтай ажиллуулах, эрчим хүчний хэрэгцээг хангахад маш чухал юм. 

Энэтхэгийн нүүрсний олборлолт 2023-2024 онд үлэмж өсч 997.826 сая тоннд хүрсэн юм. 2025 оны 2-р сарын байдлаар олборлолт өмнөх оны мөн үеийнхээс 5.45 хувиар өссөн байна. Үйлдвэрлэлийн энэхүү өсөлт нь дотоодын нүүрсний хүртээмжийг нэмэгдүүлэх, импортыг бууруулах Засгийн газрын бодлоготой салшгүй холбоотой. 

Нүүрсний үйлдвэрлэлийг цаашид нэмэгдүүлэхийн тулд Засгийн газар үйл ажиллагааны үр ашгийг дээшлүүлэх, гарцыг нэмэгдүүлэхэд чиглэсэн хэд хэдэн санаачилга хэрэгжүүлж эхлээд байна. Тухайлбал, нүүрсийг арилжааны аргаар олборлох нөхцөлийг илүү чөлөөтэй болгож, энэ салбар дахь шинэ компаниудыг тендерийн үйл ажиллагаанд хөнгөлөлттэй нөхцөлөөр оролцох боломжийг олгож байгаа юм. Энэ  нь нүүрсний салбарт хөрөнгө оруулалт, инновацийг хөхүүлэн дэмжиж, эцсийн дүндээ үйлдвэрлэлийн хүчин чадлыг нэмэгдүүлэхэд чиглэж байгаа ажээ.