Саудын Араб нефтийн үнийг бууруулна

Ч.Сансар

Дэлхийн хамгийн том газрын тос экспортлогч Саудын Араб тавдугаар сард Азийн орнуудад нийлүүлдэг нефтийн үнийг сүүлийн гурван сарын хамгийн доод хэмжээнд хүртэл бууруулах төлөвтэй байгаа талаар Ройтерс агентлаг мэдээллээ.

Саудын Арабын Aramco компани ирэх сард Ази руу нийлүүлэх Арабын хөнгөн нефтийн үнийг 1.80-2 ам.доллараар бууруулахаар төлөвлөж байна. Ингэснээр Арабын хөнгөн нефтийн үнэ 5-р сард Оман/Дубайн нефтийн дунджаас 1.50-1.70 доллараар өндөр байх магадлалтай. Оман/Дубайн нефть нь Азид нийлүүлэгддэг Ойрхи Дорнодын жишиг нефть юм.

Саудын Араб ихэвчлэн сар бүрийн тавны орчимд дараа сарынхаа түүхий нефтийн үнэ ханшаа зарладаг бөгөөд үнийн өөрчлөлтийн талаар ямар нэгэн тайлбар хийдэггүй. Энэ нь Ойрхи Дорнодын бусад томоохон үйлдвэрлэгчдэд үнэ тогтооход нөлөөлдөг.

Дөрөвдүгээр сард ОПЕК+ бүлэг нийлүүлэлтээ нэмэгдүүлснээр Саудын Араб Азийн худалдан авагчдад зориулсан нефтийн үнээ бууруулах төлөвтэй байна. Үүнээс гадна Оросын нефть Хятад, Энэтхэгийн зах зээлд дахин нэвтэрч байгаа нь нефтийн үнэ буурахад нөлөөлж байгаа аж.

Эх сурвалж. oilprice.com