Mongolian Mining Corporation компани 2025 оны эхний хагас жилийн санхүүгийн тайлангаа танилцууллаа

2025 оны 8 дугаар сарын 28, Хонг Конг – Mongolian Mining Corporation  (MMC) нь (2025 оны 6 дугаар сарын 30-ны байдлаар) эхний хагас жилийн санхүүгийн тайлангаа танилцууллаа.

2025 оны эхний хагас жилд тус компани ойролцоогоор нийт 346.6 сая ам.долларын орлого олсон нь 2024 оны мөн үеэс 35.9%-иар буурсан үзүүлэлт юм. Нийт борлуулсан угаасан коксжих нүүрсний хэмжээ 4.2 сая тонн байсан ба үүний 3.3 сая тонн нь үндсэн бүтээгдэхүүн, 0.9 сая тонн нь хоёрдогч бүтээгдэхүүн байв. Борлуулалтын хэмжээ өнгөрсөн оны мөн үетэй харьцуулахад бараг ижил байсан ч, дундаж борлуулалтын үнэ зах зээлийн сулралтын улмаас буурсан нь орлогын бууралтанд нөлөөлжээ.

Энэ хугацаанд компанийн нийт ашиг 62.9 сая ам.доллар байсан ч, ногдол ашгийн эзэмшигчдэд хуваарилагдах цэвэр алдагдал 23.3 сая ам.долларт хүрсэн байна. Үүнд голчлон борлуулалтын үнэ буурсан, мөн  өрийг дахин санхүүжүүлэхтэй холбоотой 25 сая ам.долларын алдагдал зэрэг нөлөөлсөн юм.

Тус компани Баян Хөндий алтны уурхайн бүтээн байгуулалтыг амжилттай үргэлжлүүлж байна. 2025 оны хоёрдугаар улиралд уурхайн баяжуулах үйлдвэр болон дэмжих байгууламжуудыг холбогдох байгууллагууд хүлээн авч, хөрс хуулалтын ажил эхэлсэн бөгөөд алтны үйлдвэрлэл гуравдугаар улиралд эхлэх төлөвтэй байна.

MMC-ийн гүйцэтгэх захирал, доктор Батцэнгэл “Хэдийгээр нүүрсний зах зээл эхний хагас жилд сул байсан ч, гуравдугаар улирлаас эерэг өөрчлөлт ажиглагдаж байна. Баян Хөндий алтны уурхайн үйл ажиллагаа эхэлснээр бидний ирээдүйн төлөвлөгөө баталгаатай болно гэж үзэж байна. Компанийн санхүүгийн бодлогоо чанд барьж, бизнесийн төрөлжүүлэлт болон хөрөнгө оруулалтын шинэ боломжуудыг эрэлхийлэхээр ажиллаж байна” гэж мэдэгдлээ.

The Malina Times

Санхүүгийн тайлан: mmc.mn