“Оюу толгой” дэлхийн зэсийн тэргүүлэгч 20 уурхайн тоонд багтаж, 11-т эрэмбэлэгдэв

Т.Бямбанаран

Зэсийн үнэ өнгөрсөн долоо хоногт Лондоны хөрөнгийн бирж дээр сүүлийн 16 сарын хамгийн өндөр түвшинд хүрсэн. Үүнтэй зэрэгцэн дэлхийн зэсийн эрэлт жил бүр дор хаяж нэг сая тонноор өснө гэж BHP компани таамаглаж байна. Одоогийн 33 сая тонны эрэлт 2050 он гэхэд 50 сая тонн болох төлөвтэй байна. АНУ-ын Геологийн албаны мэдээллээр, зэсийн нийлүүлэлт энэ эрэлтийг давахын тулд хоёр дахин нэмэгдэх шаардлагатай, эс бөгөөс ноцтой хомсдол үүснэ гэж анхааруулжээ.

Эрсдэл нэмэгдэж буйг илтгэх өөр нэг үзүүлэлт бол дэлхийн хамгийн том уурхайнуудын зарим нь үйлдвэрлэлийн сааталтай тулгарч байгаа явдал юм. “Grasberg” уурхайн үйл ажиллагаа зогссон нь зэсийн зах зээлд эрсдэл дагуулж байна гэж “Goldman Sachs”-ийн шинжээчид үзэж байна. Мөн гол үйлдвэрлэгчдийн нэг болох “Kamoa-Kakula” уурхайд үер болж, эзэмшигч компани болох “Ivanhoe Mines” өөрийн үйлдвэрлэлийн төлөвлөгөөг бууруулжээ. 

Дэлхийн нийт үйлдвэрлэлийг харьцуулж үзвэл, 2025 оны эхний хагас жилд хамгийн их зэс олборлосон 20 уурхайн жагсаалтыг (мянган тонноор) гаргасан байна.

Тэдгээрийн дунд Монгол Улсын Оюу толгойн уурхай 11-р байранд жагсаж буй юм. 2025 оны 6 дугаар сарын 30-ны байдлаар “Оюу толгой” 152 мянган тонн зэс үйлдвэрлэсэн байна. Рио Тинто компанийн мэдээлснээр, тус уурхай 2028–2036 онд жилд дунджаар 500 мянган тонн зэс олборлохоор зорьж байгаа аж.

Эх сурвалж: mining.com