Ч.Сансар

Дэлхийд зэсийн уурхайн үйл ажиллагаа доголдож, эрэлт нэмэгдэж буй энэ үед UBS банк зэсийн үнэ ирэх онд улам их өсөх төлөвтэй гэж үзэж байна.

Өнгөрсөн Баасан гарагт нийтэлсэн тэмдэглэлдээ UBS-ийн шинжээчид 2026 онд зэсийн үнийг өснө гэж таамаглажээ. Шинжээчдийн үзэж байгаагаар зэсийн үнэ 2026 оны 3-р сард тонн тутамд 11,500 ам.доллар, 6 дугаар сард 12,000, 9 дүгээр сард 12,500 ам.долларт хүрэх ажээ. Улмаар 12 дугаар сард зэсийн үнэ 13,000 ам.доллар хүрнэ гэж тооцоолсон байна.

Зэсийн үнэ өсөх таамаглал нь зэсийн нийлүүлэлтийн эрсдэл нэмэгдэж буй байдлын сацуу зэсийн нөөц буурч байгаатай холбоотой гэж тус банкны шинжээчид тайлбарлалаа.

Энэ жил дэлхийд зэсийн уурхайнуудын үйл ажиллагаа доголдож (жишээ нь Индонезийн Freeport-McMoRan компанийн Grasberg уурхайд гарсан осол), Чилид зэсийн үйлдвэрлэлийн сэргэлт удааширч, Перуд эсэргүүцлийн жагсаал үргэлжилж байгаа зэрэг үйл явдлууд нийлүүлэлтэд нөлөөлж байгааг UBS банк тэмдэглэжээ. Энэхүү нөхцөл байдал 2026 онд үргэлжлэх магадлалтай юм.

Эдгээр эрсдлээс шалтгаалан зах зээл дээрх зэсийн хомсдол энэ он болон ирэх жил мэдэгдэхүйц өсөх төлөвтэй гэж UBS банк үзсэн байна. 2025 онд хомсдол 230,000 тоннд хүрч, 2026 онд бараг хоёр дахин нэмэгдэж 407,000 тоннд хүрч болзошгүй ажээ. Өмнө нь хоёр жилийн зэсийн хомсдолыг 53,000 тонн болон 87,000 тонн гэж урьдчилан тооцож байсан. Энэ нь одоогийн төсөөллийн зөвхөн дөрөвний нэг орчим юм.

Мөн UBS банк зэсийн агууламж буурч, уурхайнуудын үйл ажиллагаа саатаж байгаагийн улмаас цэвэршүүлсэн зэсийн үйлдвэрлэлийн өсөлтийг 2025 онд 1.2%, 2026 онд 2.2% болгон өөрчилсөн байна.

Үүний зэрэгцээ, цахилгаан автомашины үйлдвэрлэл, сэргээгдэх эрчим хүчний хөгжил, цахилгаан шугам сүлжээний өргөтгөл, дата төвүүдийн тоо олширч буй зэрэг хүчин зүйлсийн улмаас дэлхийд зэсийн эрэлт хоёр жилийн дотор 2.8%-иар өснө гэж тус банк тооцоолжээ.

Мягмар гарагт Лондоны металын бирж дээр зэсийн үнэ 0.3%-иар өсч, тонн тутамдаа 10,777 ам.доллароос давсан байна. Энэ нь 10-р сарын сүүлд дээд амжилт тогтоосон 11,200 ам.доллароос 500 орчим ам.доллароор бага дүн боллоо. COMEX дээрх үнэ 1.1%-иар өсч, 11,070 орчим ам.доллар/тонн болжээ.