Мөнгөний үнэ унц нь анх удаа 66 ам.доллароос давлаа

Т.Бямбанаран

АНУ-ын хөдөлмөрийн зах зээл суларч, Холбооны нөөцийн сан бодлогын хүүгээ цаашид бууруулах хүлээлт дахин сэргэсэн. Үүний нөлөөгөөр Лхагва гарагт /2025.12.17/ мөнгөний үнэ анх удаа унц нь 66 ам.доллароос давлаа.

Спот зах зээл дэх мөнгөний үнэ 4 хүртэл хувиар өсөж, унц нь 66.50 ам.долларт болж, түүхэн дээд түвшинд хүрсний дараагаар тодорхой хэмжээнд дахин буурчээ. Энэхүү үнэт металл сүүлийн нэг сарын хугацаанд нийтдээ 25 орчим хувиар өсөөд байгаа нь нийлүүлэлтийн хэмжээ хязгаарлагдана гэх болгоомжлол болон АНУ-ын хүүгийн түвшин буурна гэсэн хүлээлттэй шууд холбоотой юм.

Мөн алтны үнэ мөнгөнөөс харьцангуй удаан нэмэгдэж буй ч 0.6%-иар өсөж, унц нь ойролцоогоор 4,330 ам.долларт хүрлээ. 

Санхүүгийн үйлчилгээ үзүүлдэг компани болох “Marex Group”-ийн шинжээч Эдвард Мейр нэгэн ярилцлагадаа, “Мөнгөний дараагийн зорилтот түвшин 70 ам.доллар гэж үзэж байна” гэдгээ мэдэгдсэн байна.

Энэ долоо хоногт нийтлэгдсэн АНУ-ын эдийн засгийн шинэ мэдээллүүд нь тус улсын хөдөлмөрийн зах зээл суларч байгааг харуулсан. Ажилгүйдлийн түвшин 4.6%-д хүрсэн нь 2021 оны есдүгээр сараас хойших хамгийн өндөр үзүүлэлт болсноороо онцлогтой. Үүний улмаас 2026 онд бодлогын хүүг дахин бууруулах магадлал нэмэгдэж, алт, мөнгө зэрэг үнэт металлуудад эерэг хүлээлт үүсгэжээ.

Өнгөрсөн долоо хоногт АНУ-ын Холбооны нөөцийн сан энэ оны хувьд гурав дахь буюу эцсийн байдлаар хүүгийн хэмжээг бууруулсан. Харин 2026 онд дахин хоёр удаа хүүг бууруулна хэмээн хөрөнгө оруулагчид тооцоолж эхэлсэн аж.

“DHF Capital” компанийн Гүйцэтгэх захирал бөгөөд Хөрөнгийн менежер Бас Койжман Ройтерс агентлагт өгсөн ярилцлагадаа, “Холбооны нөөцийн сан 2026 оны эхний хагаст бодлогын хүүгээ хоёр удаа бууруулна гэсэн хүлээлт зах зээлийн түвшинд байсаар байгаа” хэмээн онцоллоо.

Үүний зэрэгцээ, АНУ–Венесуэлийн харилцаа хурцдаж, АНУ-ын Ерөнхийлөгч Дональд Трамп Өмнөд Америкийн тус улсын экспорт ба импортын хоригт орсон нефть тээвэрлэгч танкеруудад бүслэлт тогтоохыг үүрэг болгосон байна.

Эх сурвалж: mining.com