Ойрх Дорнодод мөргөлдөөн даамжирч, алтны үнэ өслөө

Т.Бямбанаран

Лхагва гарагт /2026.03.04/ алтны үнэ 1.6%-иар өслөө. Учир нь АНУ болон Израилын зүгээс Иранд өгсөн агаарын цохилтууд эрчимжиж, геополитикийн тодорхойгүй байдал нэмэгдсэн нь хөрөнгө оруулагчдыг аюулгүй хөрөнгө буюу алт руу чиглүүлэх хандлагатай байна.

Алтны спот үнэ унц нь 5,168.69 ам.долларт хүрч, 1.6%-иар өссөн бол АНУ-ын дөрөвдүгээр сард нийлүүлэх алтны фьючерс 1.1%-иар нэмэгдэж, 5,178.40 ам.доллар болсон байна. Харин өчигдөр буюу Мягмар гарагт тус металлын ханш 4%-иар унаж, хоёрдугаар сарын 20-ноос хойших хамгийн доод түвшинд хүрээд байсан юм. 

“Алт ойрын хэдэн өдрийн турш энэ нөхцөл байдлыг төвөггүй даван туулж, дахин тогтворжих нь гайхах зүйл биш. Учир нь өнгөрсөн оны эхэн үеэс хойш ам.долларын ханш хэрхэн хөдөлсөн, бондын өгөөж яаж өөрчлөгдсөнөөс үл хамааран алт өөрийн гэсэн хандлагыг бүрдүүлж, харьцангуй тэсвэртэй байсаар ирсэн,” гэж “Tastylive” компанийн глобал макро стратегийн хэлтсийн тэргүүн Иля Спивак мэдэгдэв.

АНУ-Израилийн Ираны эсрэг дайны улмаас Ойрх Дорнодоос эрчим хүчний экспорт тасалдсанаар нефть, байгалийн хийн үнэ огцом өсөв. Тегеран хөлөг онгоц болон эрчим хүчний дэд бүтцүүдэд цохилт өгч, Персийн буланд усан замын хөдөлгөөнийг хаан, Катар, Ирак тэргүүтэй бүс нутгийн орнуудад үйлдвэрлэл зогсоход хүрчээ.

“Ойрх Дорнодод үүссэн геополитикийн хурцадмал байдлын улмаас газрын тосны үнэ  нэмэгдсэн нь инфляцын эрсдэлийн талаарх болгоомжлолыг улам өдөөж байна” гэж “OCBC” компанийн стратегич Кристофер Вонг хэлэв.

Лхагва гарагт мөнгөний спот үнэ 3.5%-иар өсөж, унц нь 84.92 ам.долларт хүрсэн байна. Энэ нь мөн л өмнөх арилжаагаар ханш нь унаад сэргэсэн дүн юм.

Эх сурвалж: Ройтерс