ЗӨӨВЧ-ОВОО ТӨСЛИЙН НЭЭЛТИЙН АРГА ХЭМЖЭЭ БОЛЛОО

Зөөвч-Овоо төслийн бүтээн байгуулалтын үе шат эхэлж буйтай холбогдуулан нээлтийн ёслолын арга хэмжээг 2026 оны 6 дугаар сарын 3-ны өдөр Дорноговь аймгийн Улаанбадрах суманд зохион байгууллаа.

Тус арга хэмжээнд Орано группийн ТУЗ-ийн дарга Клоод Имовэн, Дорноговь аймгийн Засаг дарга О.Батжаргал, Монгол Улсын төр, засгийн байгууллагын төлөөлөл, Орано группийн Уул уурхайн Бизнес нэгж болон “Бадрах Энержи” компанийн удирдлага, мөн туслан гүйцэтгэгч аж ахуйн нэгжүүдийн төлөөлөл оролцов. Үүний зэрэгцээ ирээдүйн Зөөвч-Овоо уурхайг Улаанбадрах сумтай холбох авто замын барилгын ажлыг орон нутгийн компаниудтай хамтран хэрэгжүүлэх бэлтгэл ажлыг хангаж байгаа ажээ.

Төслийн хүрээнд 2026 онд бага хэмжээний үйлдвэрлэлийг эхлүүлж, 2028 онд үндсэн олборлолтыг эхлүүлэхээр төлөвлөж байгаа аж. Одоогоор цахилгаан хангамж, түр кемпийн барилга байгууламж, авто зам зэрэг дэд бүтцийн бүтээн байгуулалтын ажлууд үргэлжилж байгаа бөгөөд эдгээрийг Монголын үндэсний компаниудтай хамтран хэрэгжүүлж байгааг “Бадрах Энержи” ХХК мэдэгдлээ. Гурван зуун  ажилтны хүчин чадалтай байнгын кемпийг мөн үндэсний аж ахуйн нэгжүүд барьж байгуулах юм байна.

Төслийн нийт хугацаанд шууд болон шууд бус байдлаар нийт 1,600 орчим ажлын байр бий болно гэж тооцоолжээ. Түүнчлэн орон нутгийн нийгэм, эдийн засгийн хөгжлийг дэмжих хамтын ажиллагааны гэрээг энэ оны 4 дүгээр сарын 27-ны өдөр байгуулж, эхний ээлжид 1 тэрбум төгрөгийн хөрөнгө оруулалтыг орон нутагт хийхээр болсон байна. Цаашид энэхүү дэмжлэгийг жил бүр ойролцоогоор 1 сая ам.долларт хүргэн нэмэгдүүлэхээр төлөвлөжээ.