Монголоос БНХАУ-руу хийсэн нүүрсний экспорт 48.9 хувиар өсөж Оросыг ардаа орхив

О.Дөлгөөн

ОХУ-аас Хятад руу нийлүүлсэн нүүрсний хэмжээ энэ оны эхний найман сард 10.8 хувиар буурсан бол Монголын нүүрсний импорт 48.9 хувиар өсжээ.

Хятадын Гаалийн Ерөнхий газрын мэдээллээр, нэгдүгээр сараас наймдугаар сарын хооронд Оросоос 53.15 сая тонн нүүрс импортолсон нь өнгөрсөн оны мөн үеийнхээс 10.8 хувиар бага байна. Харин Монгол Улсаас импортолсон нүүрс 78.39 сая тонн болж, 48.9 хувиар өсжээ.

Индонез энэ хугацаанд 121 сая тонн нүүрс нийлүүлсэн байна. Харин Хятад улс нийтдээ 310 сая тонн нүүрс импортолжээ. Оросын нүүрс Хятадын зах зээлд 3-6 хувийн импортын татвартай байгаа бол манай нүүрс татварын давуу нөхцөлтэйгөөс гадна байршлын давуу талтай. Харин Оросын Кузбассын нүүрс Хятадын зах зээлд хүрэхдээ урт зайд төмөр замаар болон Алс Дорнодын боомтуудаар дамждаг. Үүний улмаас тээврийн зардал нь нэмэгдэж байна.

Тухайлбал, Восточный боомтоос Хятад руу нүүрс тээвэрлэх өртөг энэ оны эхнээс есдүгээр сарын 11 хүртэл 45.5 хувиар өссөн байна. Мөн Орос улс аравдугаар сараас төмөр замын тарифыг дахин нэмэгдүүлжээ. Энэ нөхцөлд Оросын нүүрс экспортлогчид Хятадын зах зээлд үнийн хөнгөлөлт үзүүлж байгаа ч цаашид үнийг бууруулах боломж хязгаарлагдмал болсон байна. Одоогоор зарим нийлүүлэгч ойролцоогоор 10 хувийн хөнгөлөлт үзүүлж байгаа аж. ОХУ-ын нүүрсний экспортод тулгарч буй асуудал зөвхөн Хятадаар хязгаарлагдахгүй байна. Тус улс сүүлийн долоон сарын хугацаанд Турк рүү нийлүүлсэн коксжих нүүрсний хэмжээг 30 хувиар бууруулсан бөгөөд долдугаар сард тээвэрлэлт хийгдээгүй байна.